СЗО: Израел изврши 41 напад врз здравствените служби во Газа од 7 октомври

ЖЕНЕВА (АА) - Израел изврши 41 потврден напад врз здравствените служби во Појасот Газа од 7 октомври, соопшти денес Светската здравствена организација (СЗО), јавува Анадолу.

„Од 7 октомври, врз здравствените служби во Газа се потврдени 41 напад. Вкупно 11 здравствени работници загинаа додека беа на активна должност, а 16 се повредени. Како што продолжуваат нападите, овие бројки веројатно ќе се зголемат“, рече портпаролот на СЗО, Тарик Јашаревиќ, како одговор на прашањето на Анадолу за состојбата на здравствената заштита во Газа.

Изразувајќи загриженост во врска со ситуацијата, Јашаревиќ рече дека болниците во регионот се борат со огромен број пациенти, со што нивните капацитети се исполнети до крај.

Тој, исто така, нагласи дека сите здравствени работници во Газа се „исклучително отпорни“ и продолжуваат да ги извршуваат своите должности.

Јашаревиќ нагласи дека претходно набавените лекови се при крај.

Понатаму тој изјави дека Газа се соочува со критичен недостиг на гориво, што е од суштинско значење за управувањето со болниците и медицинската опрема.

Тој рече дека е „практично невозможно“ да се спроведе израелското барање за евакуација на болниците во северниот дел на Газа.

Нагласувајќи ја неможноста на хуманитарните работници и медицинските материјали да стигнат до Газа, Јашаревиќ рече дека СЗО испорачала приближно 80 метрички тони хируршки материјали и лекови за хронични пациенти во близина на египетскиот граничен премин Рафах со Газа.

Тој рече дека СЗО, заедно со другите хуманитарни организации во системот на ОН, донеле хуманитарна помош на преминот „со надеж дека ќе стигне до Газа“.

„На крајот на сè она што ни треба е крај на непријателствата бидејќи само тоа ќе спречи понатамошно губење на животи“, рече портпаролот на СЗО.

Јашаревиќ рече дека во тек се преговорите на различни нивоа за испорака на помош во Газа.