Силен дожд предизвика поплави и прелевања во Италија

РИМ (АА) - Обилните врнежи од дожд во регионите Тоскана и Емилија-Ромања во централна Италија предизвикаа поплави и прелевања, известува Анадолу.

Според вестите објавени во националните медиуми, обилните врнежи од дожд вчера забележани во регионите Тоскана и Емилија-Ромања негативно се одразиле врз секојдневниот живот.

Највисокото ниво на тревога, „црвено“, беше дадено во овие два региона поради поројните врнежи, бидејќи се зголеми нивото на водата во реките и потоците. Од тие причини, јавноста беше повикана да се држи подалеку од подрумите и приземните катови.

Во утринските часови се излеа реката Римаџо, која тече низ градот Сесто Фиорентино во Фиренца, главниот град на регионот Тоскана. Поради тоа многу улици беа покриени со вода, а италијанската противпожарна единица им помогна на возачите кои останаа блокирани во своите возила. Општината ги предупреди граѓаните да не излегуваат од домовите и да не користат возила.

Освен тоа, зголеменото ниво на водата во реката Арно, која тече низ градовите Фиренца и Пиза во регионот Тоскана, достигна алармантно ниво. Од тие причини издадено е предупредување за ризик од поплави од прв степен.

Еугенио Џани, претседател на регионалната влада на Тоскана, информираше дека состојбата на реките во регионот, особено на Арно, внимателно се следи од Цивилната заштита и дека е подготвен план за отстранување на вишокот вода во случај на поплава во Арно.

Во Фиренца, критична клучка на националната железничка мрежа, беа прекинати железничките услуги поради дождот.

Од друга страна, фериботите меѓу островот Елба во близина на брегот на Тоскана во Медитеранот и копното не можеа да сообраќаат поради неповолните временски и морски услови.

Во некои градови во Тоскана и Емилија-Ромања, каде што ситуацијата е критична, училиштата се затворени, а некои работни места се затворени денес и утре.

Во Болоња, главниот град на Емилија-Ромања, поројните врнежи предизвикаа поплавување на некои подвозници во центарот на градот.