Сѐ повеќе граѓани на ЕУ размислуваат да ја напуштат Германија поради зголемените трошоци и дискриминација

ИСТАНБУЛ (АА) – Сѐ поголем број граѓани на Европската Унија размислуваат да ја напуштат Германија поради зголемените трошоци за живот, дискриминацијата и чувството на неприпадност, објави полскиот радиодифузер „ТВР Ворлд“, јавува Анадолу.

За првпат по 15 години, повеќе граѓани на ЕУ ја напуштаат Германија отколку што се доселуваат во земјата, наведува медиумот, повикувајќи се на студија нарачана од владината комесарка за миграција, бегалци и интеграција, Натали Павлик.

Според извештајот, 35 проценти од анкетираните граѓани на ЕУ размислуваат да ја напуштат Германија, додека 13 проценти веќе презеле конкретни чекори во таа насока.

Меѓу испитаниците, 42 проценти ги навеле високите трошоци за домување како клучна причина за размислување за заминување, додека 36 проценти ги посочиле вкупните трошоци за живот.

Речиси 39 проценти од анкетираните изјавиле дека не се чувствуваат целосно интегрирани во германското општество, а меѓу 15 и 28 проценти навеле дека се соочиле со дискриминација.

Како дополнителни предизвици биле наведени јазичните бариери и тешкотиите при признавање на професионалните квалификации.