Туркије и Украина разговараа за подготовките за испорака на жито

АНКАРА (АА) - Турскиот министер за национална одбрана и украинскиот министер за инфраструктура телефонски разговараа во врска со подготовките за испорака на украинското жито од црноморските пристаништа на земјата, пренесува Агенција Анадолија (АА).

„Хулуси Акар и Олександар Кубраков изразија задоволство од отворањето на Заедничкиот координативен центар од страна на двете земји“, соопшти Министерството за одбрана на Туркије.

Двајцата министри, исто така, разменија идеи за подготовките за испорака на жито, која треба да започне оваа недела.

„Акар и Кубраков ја истакнаа потребата од продолжување на реципрочната поддршка и координација во процесот“, се додава во соопштението.

Заедничкиот координативен центар во Истанбул беше отворен вчера на церемонија на која учествуваше и шефот на турската одбрана.

Туркије, Обединетите нации (ОН), Русија и Украина минатата недела потпишаа договор за повторно отворање на трите украински пристаништа - Одеса, Черноморск и Јужни - за житото со месеци заглавено поради тековната Руско-украинска војна, која веќе влезе во шестиот месец.

Договорот се случи откако беше постигнат општ договор меѓу засегнатите страни за планот предводен од ОН за време на разговорите на 13 јули за формирање координативен центар во Истанбул за да се извршат заеднички инспекции на влезот и излезот од пристаништата и да се осигура безбедноста на рутите.

Меѓународно пофалена за нејзината улога на посредник, Туркије координираше со Москва и Киев за отворање коридор од украинскиот пристаништен град Одеса за обновување на глобалните испораки на жито.