Украина: „Потребна ни е помошта на Израел, ни треба „Железната купола“ за да ги спасиме нашите жени и деца“

АНКАРА (АА) - Украинскиот амбасадор го повика Израел да го продаде својот систем за воздушна одбрана „Железна купола“ на Киев, критикувајќи ја земјата дека одбива да обезбеди каква било воена помош, јавува Агенција Анадолија (АА).

„Говорејќи пред новинарите во Тел Авив, Евген Корнијчук рече дека тие, исто така сакаат Израел да го одобри трансферот на израелскиот противтенковски воден ракетен систем „Спајк СР“ од Германија во Украина“, објави весникот „Ерусалим пост“.

„Сакам израелската Влада да се оддалечи од својата комфорна зона и да се врати во реалноста“, истакна тој, додавајќи дека им е потребна помош од Израел.

Потсетувајќи дека, иако САД дадоа дозвола за трансфер на ракети од Германија во Украина, Корнијчук рече дека Израел одбил, додека Берлин сакал да го изврши трансферот.

„Потребна ни е помошта на Израел... Мислам дека ни треба воено-техничка поддршка; ни треба „Железната купола“ што ќе ни овозможи да ги спасиме нашите жени и деца од гранатирањето на руските ракети на нашата територија“, додаде украинскиот амбасадор.

Обвинувајќи го Израел дека се двоуми да му даде на Киев каква било воена помош, дури и одбрана, Корнијчук рече дека системот „Железна купола“ не е оружје, туку средство за спасување животи.

„Не ни треба донација, сакаме да ја купиме“, нагласи тој.

Според извештајот, извори тврдат дека е малку веројатно Израел да го продаде системот „Железна купола“ на Украина или на која било друга земја поради прописите потпишани со САД за одбранбен извоз.