Хамас упати апел за ослободување на палестинските затвореници во Саудиска Арабија

ГАЗА

Движењето Хамас упати апел за ослободување на палестинските затвореници во Саудиска Арабија, пренесува Агенција Анадолија (АА).

„Ги повикуваме властите на Саудиска Арабија во овој свет месец Рамазан веднаш да ги ослободат затворениците“, напиша во писмено соопштение Хазим Касим, портпаролот на ова движење, додавајќи дека овие палестински затвореници работеле за палестинската кауза во рамки на законите на Саудиска Арабија.

Од друга страна, друг портпарол на Хамас, Февзи Берхум, рече дека не постои образложение за задржување на Мухамед ел Худари, еден од челниците на Хамас, неговиот син, како и другите Палестинци во саудиските затвори.

Берхум истакна дека ослободувањето на овие Палестинци, особено во месецот на постот, Рамазан, е верска и морална должност.

Инаку, саудиските безбедносни сили на 4 април 2019 година го приведоа Мухамед ел Худари кој живее во Џеда.

Евромедитеранската опсерваторија за човекови права со седиште во Женева, на 6 септември 2019 година соопшти дека Саудиска Арабија без образложение во притвор задржала 60 Палестинци, меѓу кои и Мухамед ел Худари.