Челникот на Меѓународната агенција за атомска енергија бара посета на нуклеарната централа во Запорожје, Украина

ЊУЈОРК (АА) - Челникот на Меѓународната агенција за атомска енергија (IAEA) рече дека сака да ја посети украинската нуклеарна централа во Запорожје поради новите гранатирања на тој комплекс, јавува Агенција Анадолија (АА).

Рафаел Гроси пред Советот за безбедност на Обединетите нации (СБОН) изјави дека нема непосредна закана за безбедноста на нуклеарниот комплекс и локацијата врз основа на прелиминарна проценка, но предупреди дека тоа може да се промени во секој момент.

Најголемиот нуклеарен комплекс во Европа беше гранатиран неколкупати, што ја зголеми загриженоста за нуклеарна катастрофа.

Русија и Украина се обвинуваат меѓусебно за нападите на нуклеарната постројка.

Моментално Русија има контрола над објектот откако го зазеде него и околните области во март.

Гроси истакна дека е подготвен да предводи тим од експерти за проценување на физичката штета на објектот.

„На Меѓународната агенција за атомска енергија мора да ѝ се дозволи да ја изврши својата мисија што е можно поскоро“, додаде тој.

Претходно, генералниот секретар на ОН, Антонио Гутереш, повика на итен прекин на сите воени активности во и околу нуклеарната централа, предупредувајќи дека понатамошните инциденти може да доведат до катастрофа.

Русија, која побара итен состанок на Советот за безбедност, повторно ја стави вината на Украина за неодамнешните напади, додека западните земји повикаа на целосно враќање на нуклеарната централа на Украина.

Американската државна потсекретарка за контрола на оружјето и меѓународна безбедност, Бони Џенкинс, рече дека Вашингтон го поддржува предлогот на Украина за создавање демилитаризирана зона околу централата во Запорожје.

Русија ја презеде контролата врз објектот на 4 март, две недели по почетокот на својата офанзива врз Украина.