Туркије: Бројот на странски посетители се зголеми за речиси 85 отсто во периодот од јануари до ноември

АНКАРА (АА) - Бројот на странски туристи кои ја посетиле Туркије се зголеми за 84,8 отсто на годишно ниво на 42,2 милиони во периодот јануари - ноември, покажуваат официјалните податоци објавени денеска, јавува Агенција Анадолија (АА).

Бројот на посетители во периодот од јануари до ноември изнесува 12 милиони во 2020 година и 22,8 милиони во 2021 година во услови на пандемијата на Ковид-19, покажаа податоците на турското Министерство за култура и туризам.

Истанбул, најпознатиот град во Туркије и најголемиот по население, е на прво место по странски посети, привлекувајќи 14,7 милиони туристи.

По него следува туристичката дестинација Анталија со 12,6 милиони посетители, додека Едрене, подрачје во северозападниот дел на Туркије што се граничи со Бугарија и Грција, пречека 4,3 милиони туристи.

Со 5,5 милиони, Германците сочинуваат 13 отсто од сите посетители, потоа Русите со речиси 5 милиони, Британците 3,3 милиони, Бугарите 2,6 милиони и Иранците со 2,2 милиони.

Кога на пребројувањето ќе се додадат и турските државјани кои живеат во странство, бројката за 11 месеци се искачува на 47,6 милиони.

Само во ноември, странските посети во Туркије се зголемија за 44,6 отсто на годишна основа до 2,6 милиони.

Русија е земја од каде што дојдоа најголем број посетители на Туркије, 312.486, потоа следуваат Бугарија (232.709), Германија (207.340), Иран (154.643) и Грузија (151.057).