Sarp Özer
19 Април 2023•Ажурирај: 23 Април 2023
КАЈСЕРИ (АА) - Министерот за инфраструктура на Украина, Олександр Кубраков, е во посета на Туркије, а за време на посетата му беше даден на користење турскиот автомобил од домашно производство ТОГГ, јавува Анадолу.
Кубраков вчера пристигна во посета на Туркије на покана на турскиот министер за одбрана Хулуси Акар.
На средбата меѓу двајцата министри е разговарано за иницијативата за жито, која има за цел да придонесе за решавање на глобалната криза со храна. Се разговараше за чекорите што треба да се преземат за непречено продолжување на иницијативата, во чии рамки досега се испорачани 28,3 милиони тони жито во земјите кои имаат потреба, со 903 бродови.
За време на посетата на Кубраков на турскиот град Кајсери, министерот за национална одбрана Акар му врачи на користење нов автомобил ТОГГ од турско производство, што од неодамна го користи Министерството за одбрана.
Акар го пречека министерот Кубраков пред хотелот каде се одржа состанокот и му рече дека тој е првата личност што го користела тој автомобил.
„Сè уште не сме го пробале. Како ви се чини?“, праша Акар, на што Кубраков се заблагодари и рече дека му се допаѓа автомобилот.
Цената на стандардниот модел T10X на ТОГГ се движи од 953.000 турски лири (околу 50.200 долари) до 1,05 милиони лири (околу 55.600 долари), додека цената на „long-range“ моделот е 1,21 милиони лири (околу 64.000 долари).
Со две различни опции за батерии за T10X со погон на задните тркала од 160 kW (218 КС), клиентите можат да изберат помеѓу опсег од 314 километри или 523 километри.
Првата верзија на T10X може да забрза од 0 до 100 km/h за 7,6 секунди, додека втората, со почетокот на испораката во октомври, може да достигне 100 km/h за 4,8 секунди.
Втората верзија има и погон на четири тркала, со моќност од 320 kW (435 коњски сили).
Батериите Тогг T10X може да се наполнат од 20 до 80 проценти за помалку од 28 минути на станиците за брзо полнење.
Клиентите исто така можат да изберат шест различни бои за ова стилско електрично возило.
