Деветтемина државјани на Северна Македонија затекнати во загрозените подрачја во Туркије, пристигнаа во земјата

СКОПЈЕ (АА) - Министерството за надворешни работи на Северна Македонија соопшти дека деветтемина државјани на Северна Македонија, кои беа затекнати во дел од подрачјата во Туркије загрозени од последиците од земјотресите, утрово пристигнале во земјата, пренесува Анадолу.

Во соопштението на МНР се вели дека сите се во добра здравствена состојба, и дека се работи за осум ученици и нивниот ментор/наставник, кои преку програмата „Еразмус плус“ престојувале во Туркије.

„Веднаш штом беше идентификувана групата, на самото место во загрозениот регион беше испратен дипломат од Амбасадата во Анкара, заедно со дополнително возило, за да асистира во повлекувањето на групата сѐ до упатување кон земјава“, се наведува во соопштението.

„По првичната медицинска санација на две лица кај кои беа констатирани повреди, групата беше упатена најпрво во Анкара, а потоа во Истанбул каде што беше обезбедено сместување, дополнителна медицинска нега и одмор“, се додава.

Се истакнува дека засега нема нови информации пристигнати до Амбасадата во Анкара и Генералниот конзулат во Истанбул за други државјани на Северна Македонија кои се наоѓаат во евентуално загрозена состојба, или на кои им е потребна асистенција.

„Нашите претставништва остануваат отворени за евентуална интервенција доколку се појави потреба“, се истакнува во соопштението на МНР.