Burç Eruygur
27 Ноември 2022•Ажурирај: 28 Ноември 2022
ИСТАНБУЛ (АА) - Украинскиот претседател Владимир Зеленски изјави дека Украина и глобалните партнери создаваат систем за запирање на агресијата, за минимизирање на нејзините последици и за гарантирање на долгорочна безбедност во Украина, цела Европа и светот, јавува Агенција Анадолија (АА).
Нагласувајќи ја обезбеденоста со храна како „еден од клучните елементи на глобалната стабилност“ за време на обраќањето до нацијата, Зеленски истакна дека овој аспект е местото каде што водечката улога на Украина станува најочигледна.
„Благодарение на нашата иницијатива за извоз на жито од три пристаништа на Црното Море, испративме околу 12 милиони тони храна за светскиот пазар. Од оваа количина, повеќе од два и пол милиони тони се наменети за земјите кои не само што имаат недостаток на храна, туку се и во тешка криза“, додаде Зеленски.
Тој, исто така, посочи дека Украина официјално ја објави иницијативата „Жито од Украина“ со цел снабдување со украинско жито на земјите кои имаат потреба, и рече дека неговата земја веќе има договори со многу партнери за заедничка работа, особено со земјите од ЕУ, со Велика Британија, САД, Катар, Канада, Норвешка и Јапонија.
„Над 20 земји го поддржаа нашиот самит за безбедност на храната. Вкупната количина што ја акумулиравме за „Жито од Украина“ е веќе околу 150 милиони долари. Работата продолжува. Подготвуваме до 60 бродови“, нагласи Зеленски.
Нагласи дека заедно со партнерите, Украина го одржала првиот Меѓународен самит за безбедност на храната во Киев по повод комеморацијата за жртвите од Холодомор, еден од најболните настани во историјата на Украина, кога најмалку 3,9 милиони луѓе умреа од глад во периодот меѓу 1932 и 1933 година како резултат на политиката на Сталин и „колективизацијата“ на земјоделството, според Украинскиот институт за национално сеќавање.
Украина тврди дека гладот на нејзина територија бил „намерен“ и го нарече „геноцид врз украинскиот народ“.
Украинскиот претседател додаде дека претходно се сретнал со белгискиот премиер Александар де Кро и дека била одржана трилатерална средба на ниво на премиери меѓу Украина, Полска и Литванија.
