Меркел, Путин, Порошенко и Оланд разговараа за мировниот договор во Украина

БЕРЛИН (АА) - Германската канцеларка Ангела Меркел разговараше со рускиот претседател Владимир Путин, со украинскиот и францускиот претседател, Петар Порошенко и Франсоа Оланд за спроведувањето на мировниот договор во источниот дел на Украина, соопшти германската Влада, пренесува Anadolu Agency (AA).

Лидерите на Германија, Русија, Украина и на Франција ја потврдија својата посветеност на договорот од Минск во областа на безбедноста и политичките аспекти на договорот.

Тие ја истакнаа важноста на почитувањето на прекинот на огнот и повикаа на напредок во областа на размената на затвореници, соопштија од канцеларијата на германската канцеларка.

Четирите лидери изразија надеж дека ќе продолжат во овој правец и по доаѓањето на новиот претседател на Франција.

Судирите во источниот дел на Украина избија во 2014 година и оттогаш загинаа повеќе од 9.600 луѓе.

Примирјето што четирите земји го договорија во февруари 2015 година, во Минск, ги запре тешките борби меѓу украинската војска и бунтовниците поддржани од Русија, но борбата продолжи долж линијата на фронтот.