Претседателот Ши: „Кина ќе работи со Русија за промовирање на мултиполарниот свет“

МОСКВА (АА) - Кинескиот претседател Ши Џинпинг денес изјави дека Пекинг ќе соработува со Русија на „промовирање на мултиполарен свет“, јавува Анадолу.

За време на неговата деветта посета на Русија откако првпат беше избран за претседател во 2013 година, Ши рече дека ќе работи со Русија за да го направи глобалното владеење поправедно.

„Кина ќе работи со Русија за да го одржи вистинскиот мултилатерализам, да промовира мултиполарен свет и поголема демократија во меѓународните односи и да помогне глобалното владеење да биде поправедно“, изјави Ши во рамките на тридневната официјална посета на Москва.

Минатата година Ши имаше неколку разговори со неговиот руски колега Владимир Путин.

„Растот на кинеско-руските односи не само што донесе конкретни придобивки за двете нации туку, исто така, даде важен придонес за развојот и напредокот на светот“, изјави кинескиот претседател, истакнувајќи дека билатералната трговија меѓу Кина и Русија се зголемила за околу 190 милијарди долари минатата година.

„Уверен сум дека посетата ќе донесе добри резултати и ќе даде нов замав на цврстиот и стабилен раст на кинеско-руското стратегиско партнерство за нова ера“, рече Ши.

Нарекувајќи ја Русија „пријателски сосед“, Ши изрази задоволство од посетата.

„Ми причинува големо задоволство што уште еднаш стапнав на руска територија во државна посета, на покана на претседателот Владимир Путин.“

Сите очи се вперени во средбата меѓу Ши и Путин додека војната на Москва против Киев трае повеќе од една година.

Кинескиот претседател Ши Џинпинг ќе биде во посета на Русија од 20 до 22 март.