Русија тврди дека ја презела контролата над украинскиот пристанишен град Мариупол

МОСКВА (АА) - Руската армија ја презеде контролата врз опколениот пристаништен град Мариупол во Украина, изјави денеска рускиот министер за одбрана, Сергеј Шојгу, јавува Агенција Анадолија (АА).

„Мариупол го ослободија Вооружените сили на Руската Федерација и силите на Народната милиција на Народна Република Доњецк“, рече Шојгу на средбата со претседателот Владимир Путин во Москва.

Шојгу го нарече Мариупол „главен град на националистичкиот баталјон Азов“, мислејќи на екстремно десничарската група која се бори во редовите на Украинската армија.

Тој го нарече градот „моќна, утврдена област, опремена со големо количество тешко вооружување и воена опрема“.

Министерот за одбрана тврдеше дека украинските сили користат цивили како жив штит, но руската страна „ги презеде сите мерки за да ги зачува животите на цивилите“.

Шојгу предложи да се нападне централата „Азовстал“, последниот бастион на украинските трупи, но Путин рече дека таа треба да биде под опсада.

Илјадници луѓе беа под опсада во Мариупол во изминатите неколку дена со малку храна или вода откако руските сили го опколија градот.

Со оглед на тоа што групите за човекови права немаше пристап до градот, тим на Обединетите нации објави дека има сè поголеми докази за масовни гробници во Мариупол.

„Добиваме сè повеќе информации за масовните гробници што се таму“, рече Матилда Богнер од ОН минатиот месец, велејќи дека некои од доказите потекнуваат од сателитски снимки.

Откако Русија ја започна војната на 24 февруари, бројот на цивилни жртви во Украина се искачи на 2.224, додека 2.897 други се повредени, според проценките на ОН, а се стравува дека вистинската бројка е многу поголема.

„Повеќе од 5 милиони Украинци побегнаа во други земји, а над 7 милиони се внатрешно раселени“, соопшти Агенцијата за бегалци на ОН.