САД: Во пад на балон со топол воздух загинаа 5 лица

АНКАРА

Пет лица ги загубија животите во американската држава Ново Мексико по пад на балон со топол воздух за време на туристичка прошетка, пренесува Агенција Анадолија (АА).

Балонот со бои на виножито се урнал на земја откако удрил во далновод во Албакерки, најголемиот град во американската сојузна држава Ново Мексико, објави „Би-би-си“ (BBC).

Гилберт Галегос, портпаролот на полицијата, соопшти дека 4 лица починале на местото на несреќата, а дека едно лице починало во болницата каде што било пренесено по несреќата што се случила во западниот дел од градот.

Галегос информираше дека балонот се заплеткал во високонапонските жици преку кои со електрична енергија се снабдувале 13.000 куќи, а по извесно време дел од него паднал врз покривот на една куќа, а делот од балонот во кој се наоѓале туристите паднал на улица.

Федералната администрација за воздухопловство на САД (FAA) и Националниот одбор за безбедност на транспортот ќе спроведат истрага за откривање на причината за несреќата.