Abdulbesar Ademi
07 Мај 2025•Ажурирај: 08 Мај 2025
СКОПЈЕ (АА) - Претседателката на Северна Македонија, Гордана Сиљановска-Давкова, по средбата со хрватскиот колега Зоран Милановиќ, изјави дека Хрватска и покрај тоа што е членка на Европската Унија (ЕУ) има разбирање за потребите на регионот Западен Балкан, јавува Анадолу.
Сиљановска-Давкова ги пофали како традиционални пријателските односи со Хрватска кои, според неа, продолжуваат да се развиваат. Исто така, таа ја пофали поддршката на Хрватска за Северна Македонија, истакнувајќи дека нејзината земја, заедно со Албанија, направи чекор кон Европската Унија (ЕУ) во 2020 година за време на претседателството на Хрватска со европскиот блок.
„Односите во сите сфери одат напред, се разбира дека може да се развијат, дека Хрватска и покрај тоа што е членка на Европската Унија има разбирање за регионалните потреби, има разбирање за Западен Балкан. Многупати претседателот повторува дека сме географски, културно, историски дел од Европа”, рече Сиљановска-Давкова, нагласувајќи дека Северна Македонија треба да се приклучи и „политички“ во ЕУ.
Осврнувајќи се на ветото на Софија за членството на Скопје во ЕУ, Сиљановска-Давкова рече дека ветото не е пријателски инструмент и нагласи дека очекува разбирање за ова прашање.
„Ветото не е пријателски инструмент, очекувам разбирање. Се разбира, ние мора да ја тераме државната агенда бидејќи легитимитетот ни извира од граѓаните. Кога го велам ова, мислам економски, мислам културно, образовно, научно да се развиваме”, рече Сиљановска-Давкова.
Милановиќ, од друга страна, рече дека на земјата ѝ е потребна помош за да го надмине прашањето за ветото, нагласувајќи дека прашањето за ветото за Северна Македонија треба да се третира како „проблем“ на земјата, а не како „грешка“.
„Вие добивате многу совети од вашите соседи, од меѓународната дипломатија, од ЕУ и сите тие совети не се паметни ниту корисни за вас. Вие сте тие што ќе одлучите што е важно за вас. Само немојте да бидете жртва на некаква принуда кога станува збор за членството во ЕУ“, рече Милановиќ.
Хрватскиот претседател, исто така, рече дека Северна Македонија е членка на НАТО и како таква е безбедна во рамките што ги овозможува НАТО, нешто што е „добро и исплатливо“.
Денес Милановиќ е во официјална посета на Северна Македонија, каде што беше пречекан од претседателката Сиљановска-Давкова.
Во ноември 2020 година Бугарија стави вето на преговарачката рамка на Северна Македонија со ЕУ, поради спорови околу историјата, јазикот и барањето за правата на бугарската заедница во земјата.
