Челникот на Агенција Анадолија ја пофали улогата на социјалните медиуми во поразот на пучот во 2016 година во Турција

ИСТАНБУЛ (АА) - Социјалните медиуми играа клучна улога во поразувањето на обидот за пуч во Турција во 2016 година, порача генералниот директор на Агенција Анадолија (АА) Сердар Караѓоз.

Обраќајќи се на панел-дискусијата за поразениот обид за воен удар од 15 јули 2016 година од страна на терористичката организација ФЕТО, Караѓоз се осврна на улогата на социјалните медиуми во победата на турската Влада и народот, како и за известувањето на меѓународните медиуми.

Тој потсети дека пучистите првично се обидоа да го преземат националниот радиодифузер ТРТ и сателитскиот комуникациски оператор ТУРКСАТ, и нагласи дека турскиот народ, поттикнат од повикот на претседателот Реџеп Таип Ердоган, ефикасно ги користел социјалните медиуми за да се спротивстави и на крајот да помогне во поразот на обидот за пуч.

„Од друга страна, реакциите на меѓународните медиуми и глобалните владејачки елити беа одредени од рамнотежата на силите“, рече тој.

„За секунда, да замислиме дека обидот за државен удар беше успешен“, рече Караѓоз, „[Меѓународните] наслови(те) немаше да бидат поразлични од оние што беа користени за пучот во Египет (2013).“

Исто така, осврнувајќи се на одговорот на меѓународните организации и светските сили на поразениот пуч, Караѓоз истакна дека политиката на меѓународните медиуми е во согласност со меѓународните етаблирани елити.

„Сепак, владејачките елити го сменија курсот кога видоа дека обидот за државен удар е поразен, а меѓународните медиуми го следеа примерот“, рече Караѓоз.

За ставовите на меѓународните организации во текот на ноќта тој 15 јули, Караѓоз рече дека воениот блок НАТО - во кој Турција е долгогодишна членка - имал балансиран пристап, додека ЕУ не успеала во тоа.

„Додека турскиот народ не излезе на улиците против пучистите, Европската Унија беше тивка“, рече Караѓоз.

Турските лидери ја критикуваа навиката на ЕУ да се обидува да ѝ држи лекции на Анкара за демократијата, и за незаземањето јасен став против антидемократските сили што ѝ се закануваат на Турција.

„Сепак, таа вечер“, додаде тој, „турската дијаспора во Европа, заедно со арапската и пакистанската дијаспора излезе на улиците против обидот за воен удар.“

Терористичката организација ФЕТО и нејзиниот водач Фетула Ѓулен, кој живее во Соединетите Американски Држави (САД), го организираа неуспешниот обид за пуч во Турција на 15 јули 2016 година, во кој загинаа 251 лице, а повредени беа 2.734 лица.

ФЕТО стои и зад долготрајната кампања за уривање на државниот поредок преку инфилтрирање на своите приврзаници во турските институции, особено во војската, полицијата и судството.