١٩٤ پێگەی داعش بۆردومانکران و ٦٥ تیرۆریست کوژران

ئەنقەرە- AA

لە چوارچێوەی ئۆپەراسیۆنی قەڵغانی فوراتدا کە لەلایەن سوپای تورکیاوە بۆسەر پێگەکانی تیرۆریستان لە باکووری سووریا بەردەوامە لە ١٥٣ەمین رۆژی ئۆپەراسیۆنەکەدا، ١٩٤ پێگەی رێکخراوی تیرۆریستیی داعش کرانە ئامانج و ٦٥ تیرۆریستی رێکخراوەکە کوژران.

بەپێی ئەو زانیارییانەی کە لەلایەن سوپای تورکیاوە بڵاوکراونەتەوە، ئۆپەراسیۆنی قەڵغانی فورات کە لە ٢٤ی ئابی ٢٠١٦ەوە بەمەبەستی نەھێشتنی ھەڕەشەی رێکخراوە تیرۆریستییەکان و بەرزکردنەوەی ئاستی ئاسایشی سنوور لە باکووری سووریا دەستی پێکردووە، درێژەی ھەیە.

لە ١٥٣ەمین رۆژی ئۆپەراسیۆنەکەدا، ١٩٤ شوێنی حەوانەوە، سەکۆی بەرگریی، ناوەندی فەرمانداریی چەک و ئۆتۆمبیلی چەکدارانی داعش کە پێشتر دیارییکرابوون، کرانە ئامانج و لەناوبران.

لە ئۆپەراسیۆنەکانی فڕۆکە جەنگییەکانی سەربە ھێزی ئاسمانیی تورکیاشدا، ژمارەیەک پێگەی رێکخراوی تیرۆریستیی داعش لە ھەریەک لە ئەلباب و بزاعە بۆردومان و خاپوور کران کە پێکھاتبوون لە ١٠ پێگەی بەرگریی، ٦ بارەگا و ٧ شوێنی حەوانەوە و کارگەیەکی بۆمبڕێژکردنی ئۆتۆمبیل.

ھاوکات فڕۆکە جەنگییەکانی سەربە ھێزەکانی ھاوپەیمانان لە ھەریەک لەناوچەکانی تادیف، ئەبو جەبار و ئوەیشییە ٣ ھێرشی ئاسمانییان کردە سەر پێگەکانی داعش و لەئەنجامی دوو ھێرشی فڕۆکە بێفڕۆکەوانەکاندا تانکێک و ئۆتۆمبیلێک بەچەکەوە، سێ ئۆتۆمبیل و سەکۆیەکی ھاوەن خاپوورکران.

لەئەنجامی ھێرشە ئاسمانیی و زەمینییەکانیشدادا بەدرێژایی رۆژ، ٦٥ تیرۆریستی داعش کوژران.

لەلایەکی دیکەوە ٢٥ بۆمبی دەستکرد و ١٢مین لەلایەن ئەو تیمانەوە پووچەڵکراونەتەوە کە پشتیوانیی ھێزەکانی ئۆپۆزسیۆن دەکەن و لە سەرەتای ئۆپەراسیۆنەکەشەوە تا ئێستا ٣ ھەزار و ١١٣ بۆمبی دەستکرد پووچەڵکراونەتەوە و ٥٥ مین بەشێوەیەکی کۆنترۆڵکراو، تەقێنراونەتەوە.