ئەنقەرە
سەرۆکی سۆماڵ (عەبدی فەراح شەردون) دوای ھێرشە تیرۆریستییەکەی سەر بالیۆزخانەی تورکیا لە مەقادیشۆ بۆ یەکەمجار سەردانی تورکیای کرد و رایگەیاند: ئامانجی حکومەتی سۆمال لە ناوبردنی رێکخراوی تیرۆریستی شەبابە.
سەرۆکی سۆماڵ (عەبدی فەراح شەردون) لە لێدوانێکدا بۆ ئاژانسی ئەنادۆلو رایگەیاند: تا کۆتایی بە رێکخراوی تیرۆریستی شەباب نەھێنرێ ئەوا مەترسییەکان ھەر بەردەوام دەبن و دەبێ ئیستیخبارات و ھێزە ئەمنییەکانی ئێمە تواناکانیان زیاتر بکەن و گوتی" دەمانەوێ رێکخراوی تیرۆریستی شەباب لە ناوبەرین، بەڵام کەی لە ناو دەچێ نازانین.
عەبدی فەراح شەردون باسی ھێرشە تیرۆریستییەکەی سەر مارکێتێکی شاری نایرۆبی لە کینیا کرد و گوتی" ئێمە بە توندی ئیدانەی ئەو ھێرشە تیرۆریستییە دەکەین و پێشتر ھیچ جۆرە زانیارییەکمان سەبارەت بەو ھێرشە پێنەگەیشتبوو. ئیوارەی ھەمان رۆژ لە پەیوەندییەکدا سەرەخۆشیمان لە سەرۆکی کینیا کرد.
سەرۆکی سۆمال ئاماژەی بەوەدا کە جارجار بەر لە ھێرشەکانی رێکخراوی شەباب لە سۆمال ئاگادار دەکراینەوە، کەچی ھیچ زانیارییەکی پێشوەختمان سەبارەت بە ھێرشەکەی نایرۆبی پێ نەگەیشتبوو و گوتی" رێکخراوی شەباب رێکخراوێکی زۆر مەترسیدارە و لە دژی ھەر جۆرە دەسەڵاتێکە و زۆربەی جاران بۆ گەیشتن بە ئامانجی خۆی منداڵان بەکار دەھێنێت.
