Almir Terzic
30 Јануари 2023•Ажурирај: 01 Февруари 2023
ЉУБЉАНА (АА) - Словенечката агенција за разузнавање и безбедност откри и приведе двајца странски државјани во Љубљана, осомничени за шпионажа во корист на Русија. Работеле под превезот на претприемачи со државјанство на една од јужноамериканските земји во деловна зграда надвор од Бежиград (градска општина Љубљана), јавува Агенција Анадолија (АА).
Според неофицијалните информации, врз основа на известувањето на Словенечката агенција за разузнавање и безбедност (Сова), подигната е преткривична постапка и на почетокот на декември минатата година е поднесено барање до истражното одделение на Окружниот суд во Љубљана за истрага против две физички лица приведени за кривичното дело шпионажа, потврдија за словенечкиот весник „Дело“ во Окружното обвинителство во Љубљана. Во гонењето и приведувањето на осомничените учествуваше и Националното биро за истраги (НПУ).
Двајцата руски агенти имале изнајмена канцеларија во деловната зграда „Леснина“ на улицата „Пармова“ во Љубљана. Компанијата, која служеше како параван за нивната работа во Словенија, се вели дека формално се занимава со трговија со недвижности и антиквитети. И двајцата приведени имале државјанство и пасоши на трети земји и не се претставувале како руски државјани. Според „Дело“, најмалку еден од нив имал аргентинско државјанство.
Според неофицијални информации, откриената ќелија на шпиони од Љубљана наводно спроведувала операции не само во Словенија, туку и во странство. Акцијата требало да биде извршена во соработка со странски разузнавачки служби.
На двајцата осомничени за кривичните дела шпионажа и проверка на лажна содржина им се закануваат вкупно осум години затвор. Додека двајцата се во притвор, против нив по наредба на судот е подигната истрага поради сомнеж дека сториле кривично дело шпионажа за странска разузнавачка служба и кривично дело проверка на невистинита содржина од член 253 став 2 од Кривичниот законик.
