БАХМУТ (АА) - ДАВИТ КАЧКАЧИШВИЛИ -
Цивилите кои живеат во украинскиот град Бахмут, познат како место каде што се случија најтешките конфликти во војната со Русија, се обидуваат да бидат евакуирани под жестоки напади, јавува Агенција Анадолија (АА).
Градот Бахмут во областа Доњецк практично е во урнатини поради жестоките конфликти, а цивилите кои живеат во областа секојдневно се борат да преживеат.
Патиштата кои водат до Бахмут, кои руските сили се обидуваат да ги опколат, исто така се изложени на тешко бомбардирање.
Во многу тешки услови продолжува евакуацијата на цивилите кои живеат во градот и околните населени места, кои се под контрола на Украинската армија.
- Евакуација на цивили во побезбедни области -
Официјални лица на Министерството за внатрешни работи на Украина користат оклопни возила за да влезат во зоната на конфликт и да ги евакуираат цивилите од Бахмут во побезбедни области.
Екипата на АА успеа да влезе во Бахмут и да ја сними операцијата за евакуација на цивилите од таа област.
Портпаролот на полициската управа на Бахмут, Павло Дјаченко, за АА изјави дека Министерството формирало специјален тим наречен „Белиот ангел“, чија задача е да ги евакуира цивилите од областите каде што продолжуваат жестоките судири.
Како што рече, животот во Бахмут за цивилите станува сѐ потежок и поризичен.
Дјаченко истакна дека им помогнале на многу граѓани кои сакале да бидат евакуирани да ја напуштат областа, истакнувајќи дека станува сѐ потешко да се евакуираат луѓето на безбедно.
Тој рече дека успеале да евакуираат многу луѓе од најопасните подрачја на периферијата на градот.
„Денеска дојдовме на два километри од непријателските позиции. Таму постојано се случуваат артилериски и минофрлачки напади“, рече Дјаченко.
Тој нагласи дека Украинската армија продолжува да го штити градот, и покрај нападите на Руската армија.
„Целиот град е под контрола на Украинските вооружени сили“, објасни тој.
- Во градот има околу 8.000 цивили -
Според неговите информации, во градот моментално живеат околу 8.000 цивили, меѓу кои и деца.
„Ги евакуираме луѓето кои сакаат да бидат евакуирани и доставуваме хуманитарна помош до граѓаните“, рече Дјаченко.
Екатерина Титоренко (74), која Дјаченко и неговиот тим ја евакуирале, изјави дека привремено ќе побегне во украинскиот град Днипро.
Таа рече дека нејзината двокатна куќа во Бахмут била уништена во руските напади.
„Бев надвор во дворот од куќата. Само слушнав бучава. Отпрвин не обрнував внимание бидејќи постојано се слушаат експлозии. Се свртев и видов дека граната ја погоди мојата куќа. Вториот кат и покривот на куќата се целосно уништени. Некое време бев кај соседите“, рече Екатерина.
- Војната трае над 11 месеци -
Војната меѓу Русија и Украина трае повеќе од 11 месеци.
Цивилите кои се евакуираат од областа Доњецк, каде што се водат најжестоките судири, најчесто се носат на железничката станица во градот Покровск.
Луѓето кои се евакуираат од различни градови и села со воз, потоа се испраќаат во побезбедни области.
