Зеленски: „Борбите се водат на фронт долг најмалку 1.000 километри“

КИЕВ (АА) - Претседателот на Украина, Владимир Зеленски, изјави дека во војната против Русија борбите продолжуваат на фронт долг најмалку 1.000 километри и дека најинтензивните судири се водат во Доњецката Област, известува Агенција Анадолија (АА).

„Знаеме за што се подготвува непријателот. Ќе одговориме и ќе продолжиме да ги ослободуваме нашите територии“, порача Зеленски во пораката на Телеграм.

Истакнувајќи дека руските сили продолжуваат со напади со ракети и беспилотни летала камикази во Украина, Зеленски напомена дека украинските сили уништуваат сè повеќе проектили и беспилотни летала.

„Мораме да обезбедиме целосна заштита на воздушниот простор на Украина и ќе продолжиме да правиме сè што е можно за да го обезбедиме тоа“, рече Зеленски, наведувајќи дека очекува добри вести во врска со воведувањето на системите за противвоздушна и противракетна одбрана на земјата.

Зборувајќи дека Русија користи беспилотни летала од иранско производство против Украина и дека се појавиле разни пораки дека некои ирански официјални лица го признале тоа, Зеленски рече дека со сигурност знаат дека ирански инструктори учеле руски терористи да ги користат дроновите, а Техеран за тоа молчи.

Истакнувајќи дека најинтензивните судири се водат на Доњецкиот фронт во Украина, Зеленски рече: „Континуираните судири продолжуваат на други делови на фронтот. Борбите продолжуваат на линија на фронтот од најмалку 1.000 километри.“

Потсетувајќи дека транспортот на житото од украинските пристаништа продолжува благодарение на иницијативата за жито преку Црното Море, Зеленски истакна: „Во изминатата недела 28 брода кои транспортираа повеќе од 800.000 тони земјоделски производи ги напуштија пристаништата Одеса, Черноморск и Пивдениј.“