Регулаторот на ЕУ за лекови ги истражува нуспојавите од вакцината на „АстраЗенека“

АНКАРА (АА) - Европската агенција за лекови (ЕМА) денес соопшти дека ја продолжува истрагата за можните нуспојави на вакцината против коронавирусот што ја развија „АстраЗенека“ и Универзитетот „Оксфорд“, пренесува Агенција Анадолија (АА).

Со оглед на тоа што неколку европски земји неодамна ја запреа употребата на вакцината, ЕМА наведе дека се работи за претпазливост и дека се истражуваат извештаите за луѓето кај кои се јавуваат згрутчувања на крвта по вакцинацијата.

„Случаите со згрутчувања на крвта, некои со необични својства, како мал број тромбоцити, настанаа кај многу мал број луѓе што ја примија вакцината“, наведоа од ЕМА и додадоа дека илјадници луѓе во ЕУ годишно од различни причини добиваат згрутчување на крвта.

Оваа агенција нагласи дека блиску соработува со компанијата, со експертите и со другите здравствени власти во истрагата, до ригорозна анализа на сите податоци во врска со случаите со тромбоемболија што ќе бидат објавени наредните денови.

Досега примената на вакцината „АстраЗенека“, привремено ја суспендираа, меѓу другите, властите на Германија, Норвешка, Данска, Исланд, Романија, Италија, Ирска и Бугарија.

„АстраЗенека“ објави дека нема причини за загриженост поради вакцината и дека помалку пријавени случаи на тромбоза има кај оние што ја примиле вакцината, отколку генерално во популацијата.