Паника откако над 150 крокодили побегнале од фарма во Јужна Африка

ЈОХАНЕСБУРГ (АА) - Повеќе од 150 крокодили побегнаа од местото каде што биле одгледувани во покраината Мпумаланга во Јужноафриканската Република, што предизвика паника во регионот, пренесува Агенција Анадолија (АА).

Април Лукел, официјален претставник на Агенцијата за паркови и туризам на Мпумаланга (MTPA), за државниот радиодифузер САБК (SABC) изјави дека околу 160 крокодили побегнале од приватна фарма каде што биле одгледувани, а дека 52 од нив се фатени.

Крокодилите побегнале кога се срушила оградата поради континуираните врнежи од дожд кои го зафатија подрачјето.

Лукел ги предупреди жителите да не се приближуваат до реката Санд, која е близу до фармата, како ниту до браните во околните села, бидејќи крокодилите излегуваат од брзите води и престојуваат надвор од нив, поради што се опасни и за луѓето и за стоката.

Загрижените жители на таа област ги замолија властите да ги фатат преостанатите крокодили пред да има човечки жртви, бидејќи повеќето од децата пливаат во таа река, а некои луѓе таму одржуваат и ритуали.

„Дозволата за програмата за размножување [на крокодили на фармата] ќе биде одземена така што ќе се даде повторна шанса за обнова на објектот. Ако тоа добро се спроведе повторно ќе ја издадеме дозволата“, соопшти официјален претставник.